BALOCHISTAN FORUM
Would you like to react to this message? Create an account in a few clicks or log in to continue.
Affiliates

کسہ ناسرجم اَنت

Go down

کسہ ناسرجم اَنت Empty کسہ ناسرجم اَنت

Post  Baloch Sat Jun 03, 2017 5:12 am

چندن ساچ

انسان مُدام وابانی پُشت ءَ زندگ انت ءُ سفر کنت۔ ہمے واب اَنت کہ انسان ءَ زندگ بُوہگ ءِ سکین ءَ دئینت۔ پدا اے واب انسان ءَ کُجا برنت ءُ سر کننت؟ پمیشکا استاد صبا دشتیاری ءَ گشتگ
"واب باریں کُجا برنت زند ءَ”
کراچی ءِ دمگ ملیر پانزدھ ءَ کہ گوزئے ءُ دیم پہ کوہی گوٹھ ءِ نیمگا روگ ءَ بئے۔ ہمے راہ ءِ سرا یک ہوٹلے کیت کہ آئی ءِ نام انور بلوچ ہوٹل اِنت۔ ہمدا ملیر پُہل اِنت۔ ہمے پُہل ءِ گوریچانی نیمگا کسانیں راہے گوزیت ہمے راہ ءَ بگر ءُ کمو دیما برو تہ یک ماڈی یے پدر بیت۔ اے استاد صبا ءِ وابانی بنجل اِنت کہ سید ہاشمی ریفرنس کتاب جاہ ءِ نام ءَ زانگ بیت۔ اِے کتاب جاہ ءَ وڑ وڑیں کتاب اَنت ءُ ہر کسے بہ لوٹیت اودا شُت ءُ ونت کت کنت۔
ہمے کتاب جاہ ءِ کش ءَ دگہ کوٹی یے کہ آ ہمے کتاب جاہ ءِ واب گندوکیں کارست ءِ نام ءَ اِنت۔ بزانکہ استاد صبا دشتیاری ءِ پٹ ءُ پولی بنجل۔ اِے بنجل ءِ تہا صبا دشتیاری ءِ کتاب، عکس، پچ ءُ پوشاک، سرجم ءُ ناسرجمیں کار ءُ دگہ بازیں یاد گاریں چیز اَنت کہ ایر اَنت۔
من مُدام ہمے درگاہ ءَ رواں گڑا منی چم حونی ئیں پوشاک ءُ استاد ءِ جتا جتائیں موسمانی عکساں کپنت۔ اِے عکسانی وتی یک دنیایے ءُ ہمے دنیا ءِ کارست استاد صبا اِنت کہ آئی ءَ واب گندگ ءِ رپک ءُ ھنر زانتگ۔ ہمدا لہتیں دراز اَنت۔ ہمے درازاں کہ پچ کناں تہ چنچو ناسرجمیں واب اَنت کہ گوانزگانی میار اَنت۔ اے ناسرجمیں واب دست ایر مرزگ، چنڈینگ ءُ لیلو لوٹنت۔ بَلے مات ءِ بدل ماتو نہ بیت۔ پمیشکا نوں اِے واباں پہ نا امیتی وتی لنٹ گٹ پاتکگ ءُ بے تواری ءِ جلگہیں زر ءِ نیمگا چارگ ءَ اِنت۔
زندگی ءِ سفر ہمیش اِنت، داں مردم زندگ اِنت گڑا امیت داریت کہ من اے کناں، من آ کناں، صبا دشتیاری ہم ہمے وڑ بوتگ۔ آئی ءَ وتی رؤگ ءَ پد بازیں کار ناسرجمی ءَ یلہ داتگ۔ اِدا یک ناں بلکیں بیست کتاب ءَ چہ گیش ایر اِنت کہ ناسرجم اَنت۔ لہتیں انچیں کتاب اَنت کہ بس آیانی نام ءُ لڑ نبشتہ کنگ ءُ یلہ دئیگ بوتگ اَنت۔ چشکہ "لبزانک ءُ میتھالوجی، بلوچی لبزانک ءُ کراچی ءُ دگہ بازیں کتاب اَنت۔ ہمے وڑا بانل دشتیاری ءِ زند ءُ ازم، سید ءِ تلمیحات، یک گدارے، (کہ آئی ءِ یک ءُ دو در نبشتہ بوتگ) بلوچی تاک ءُ ماہ تاکانی لڑ ءِ کتاب ءَ ہوار بازیں کتاب اَنت کہ ناسرجم اَنت۔ اے کاراں کہ مردم پہ ناسرجمی ءَ گندیت گڑا مردم زانت کہ مزنیں مردم چون ءُ کُجام وڑا وتی کاراں گیشنیت ءُ پدا ہما وہد ءِ ودار ءَ کنت کہ روچے ناں روچے من اے کاراں الم کناں۔۔۔۔۔۔ بَلے اناگہ ءَ زندگی وتی ہلاسی ءِ جار ءَ جنت ءُ پدا ہمے کار۔۔۔۔۔۔۔۔۔۔۔۔۔۔۔؟؟؟ پہ ناسرجمی ءَ پش کپنت۔
دنیا ءِ تہا چشیں انسان نیست کہ آیانی واہگ سرجم بوتگ اَنت۔ ہر کُجا بچار کسہ ناسرجم اَنت۔ البیئر کامیو کہ وہدے وئیل ءِ آماچ بیت ءُ مریت گڑا آئی ءِ گاڈی ءَ یک گدارے دز کپیت۔ اولی بنی آدم، کہ ناسرجم اِنت۔ اے ہمے گدار اِنت کہ کامیو وتی مرگ ءِ وہد ءَ ایشی ءِ نبشتہ کنگ ءَ دز گٹ بوتگ۔ ہمے وڑا دنیا ءِ دگہ نبشتہ کاراں ہم مردم گندیت۔ گابریئل گارسیا مارکیز وتی الوداعی کلوہ ءِ تہا نبشتہ کنت۔
” اگاں حدا من ءَ پدا زندگی بہ دنت گڑا من ہمائی ءَ جیڑاں، آئی ءَ نہ گوشاں، بلکیں ہمائی ءَ گوشاں، ہمائی ءِ بابت ءَ جیڑاں۔ من چیزانی عزت ءُ شرف آیانی قیمت ءَ چہ نہ کناں، بلکیں آیانی معنا ءِ پدا آیاں بستار دئیاں۔ من کم وپسان ءُ آگہی ءَ واب گنداں، پرچا کہ من ءَ سما بوتگ ہر ہما منٹ ءَ وہدے ما چماں بند کنیں، ما سرجمیں شست سیکنڈ ءَ چہ رژنائی ءَ محروم بیں۔
وہدے آ دگہ مردم اوشت اَنت من جنزان کناں۔ آ دگہ مردم وپس اَنت من آگہہ باں۔ وہدے مردم حبر کننت من گوش داراں۔ من وش وشیں چاکلیٹ وراں۔ اگاں حدا من ءَ پدا زندگی بہ دنت گڑا شوک شوکیں پچ ءُ پوشاک گورا کناں۔ روتاپ ءَ ننداں۔۔۔ بس پہ وتی جسم ءِ گرم کنگ ءِ واستا ناں، بلکیں وتی روح ءَ ہم ہمے گرمی ءَ سر کناں۔ ھے حدا اگاں من دلگران بہ باں گڑا وتی حسد ءُ کینگ ءَ برف سرا نبشتہ کنان ءُ پدا روچ ءِ در آیگ ءِ ودار ءَ ننداں دانکہ برف ءِ پجی ءَ منی حسد ءُ کینگ ہم آپ بہ بنت۔ من چو وین گاگ ءَ استارانی سرا لچہ پر بندان ءُ پہ ماہ ءَ مہر ءُ دوستی ءِ سؤت الہان کناں۔ من گوں وتی ارساں گلاباں آپ دئیان ءُ کنٹگانی درد ءُ گلابی شاہانی مارشتاں ماراں، ھے حدا اگاں من ءَ زندگی پدا رست گڑا من چُشیں ہچ روچ نہ گوازیناں کہ مردماں مہ گوشاں، من ءَ گوں شما مہر اِنت، من ہر مرد ءُ جنین ءَ گوشاں کہ آ من ءَ دوست اَنت۔ من مہر ءَ گوں مہر کناں۔ من مردماں گوشاں آ رد سرپد بنت کہ مردم پیراں سری ءَ مہر کُت نہ کنت۔ آ نہ زاننت کہ آ وہدے مہر ءُ دوستی ءِ دامن ءَ یلہ کننت گڑا پیری ءِ کورچات ءَ کپنت۔ من زہگاں بانزل دئیاں، بَلے آیاں گوشاں کہ وت بال بہ کننت۔ من پیریناں گوشاں مرگ پہ پیری ءَ نئیت بلکیں درستیں چیزانی شموشگ ءِ نام مرگ اِنت۔ او انساناں من چہ شما باز در برتگ۔ من اے ہم دیستگ کہ ہر کس کوہ ءِ ٹُل ءَ رؤگ لوٹیت ءُ آ اے نہ زاننت کہ اسل وشی اے واہگ ءَ گوں بستگ، چوں کوہ ءِ ٹل ءَ سر بہ باں۔ من اے ہم دیستگ کہ کسانیں گونڈوے وہدے وتی پت ءِ لنکک ءَ گپیت گڑا آ پہ مُدامی وتی پت ءَ وتی مہرانی سانکلاں گوں بندیگ کنت۔ من اے ہم در برتگ کہ انسان جہل ءَ ہما وہد ءَ چاریت کہ آئی ءَ دگرے چست کنئگی بہ بیت۔ او انساناں من چہ شما باز در برتگ۔ بلے راستی ایش اِنت من اگاں ایشاں درانگاز مہ کنان ءُ کبر ءَ بہ براں گڑا اِے بد بحتی ءِ مرگ بیت”
اِے ہما گپ اَنت کہ مارکیز ءِ دل ءَ بوتگ اَنت۔ اِے ہما واہگ بوتگ اَنت کہ مارکیز ءَ سرجم کنگ لوٹتگ اَنت۔ بَلے چش نہ بیت۔
برطانیہ ءِ نبشتہ کار ائین بینکس ءَ کہ وہدے کینسر بیت گڑا آئی ءِ دوست ائین بینکس ءِ گندگ ءَ روت۔ بینکس اے گپ ءَ زانت کہ آ نوں کمو وہد ءِ مہمان اِنت۔ (یک نبشتہ کارے بزانت کہ آئی ءِ گورا زندگی ءِ کمو روچ پشکپتگ گڑا آئی ءِ جاور چون بیت؟ توبہ) سٹوارٹ کیلی (کہ ائین ءِ دوست بیت) گوشیت من وہدے آئی ءِ کوٹی ءَ پترتگاں گڑا ائین بینکس ءَ لہتے کتابانی نیمگا دست ٹال کتگ ءُ گشتگ کہ
"اے ہما کتاب اَنت کہ وانگ ءَ پش کپتگ اَنت بزانکہ وانگ نہ بوتگ اَنت۔ بژن ءِ گپ ایش اِنت کہ نوں اے وانگ نہ بنت”
بچار ائین بینکس ءِ چونیں لوٹے کہ کتاب وانگ ءَ پشکپتگ اَنت آ ہمے چیز ءَ دردیگ اِنت۔
رُوم ءِ نبشتہ کار ایلبیرتو موراویا جاہے وتی حالترانے ءَ گوشیت کہ
"من ونت نہ کُت۔ بس نوھ سال اسکول ءَ گوست بَلے پدا ٹی بی ءِ سبب ءَ وانگ ءِ سفر دیما نہ شت”
ترکی ءِ نامداریں نبشتہ کار اورحان پامک ءَ پینٹر بُوگ ءِ شوک بیت بَلے پدا پینٹری ءِ پڑا نہ روت ءُ نبشتہ کارے بیت۔ ہمے واہگ ءِ پدا گڑا اورحان پاموک وتی گدار "منی نام سُہر” ءَ نبشتہ کنت۔
ژاں پال سارتر جاہے گوشیت کہ
"مرگ من ءَ ہچ کُت نہ کنت۔ وہدے مرگ کیت گڑا من وتی زندگی ءِ گڈی دانک ءَ نبشتہ کنگ ءَ باں”
پابلو نرودا وتی یاتانی دپتر ءِ پیش گال ءَ جاہے نبشتہ کنت کہ
"اے سر گوست یا یاتانی دپتر ءَ اِدا اودا لہتیں جاہ ھورک اِنت اِے برے برے شموشگ بنت۔ پرچا کہ ہمیشی نام زندگی اِنت”
استاد صبا دشتیاری ءِ کتاب آس ءُ آسیب ءِ گڈی آزمانک "سر تو کمیونسٹے ئے؟ ہم ناسرجم اِنت ءُ کتاب ءَ ہوار اِنت۔ بلوچی زبان ءِ کوہیں کلات سید ہاشمی وتی زند ءَ سید گنج ءِ چاپگ ءِ واب ءَ گندیت بَلے پدا ہمے واب ناسرجم بیت۔
اسل ءَ زندگی ہمے ناسرجمیں واہگانی سفر ءِ نام اِنت۔ مئے زندگی ءِ تہا باریں چنچو واہشت اَنت کہ ناسرجم بنت۔ چنچو عاشقاں وتی دوست دارانی راہ چار اِتگ ءُ پدا چم اِش بے روک بوتگ اَنت۔ ہمے عشق ءِ سند ءُ بندانی موسماں چنچو مردماں مرگ ءِ آچشیں کورم ءِ تہا دَور کتگ ءُ چنچو چہ وتی چاگرد ءَ جستگ ءُ چو شئے مرید ءُ قیس ءَ جنگل پہ جنگل بوتگ۔ برے برے من ءَ گمان بیت کہ زندگی ہمے ناسرجمیں کاراں وش کتگ۔ اگاں اے کار سرجم بہ بنت گڑا زند بے لذت بیت۔


Last edited by Baloch on Mon Jun 05, 2017 7:01 pm; edited 2 times in total (Reason for editing : font size)
Baloch
Baloch
Admin

Posts : 400
Join date : 2010-12-28

https://baluchistan.forumotion.com

Back to top Go down

Back to top


 
Permissions in this forum:
You cannot reply to topics in this forum